२७ भदाैं, पर्वत । हरितालिका तीज आउनुअघि नै कुश्माका होटल तथा रिसोर्टहरूमा चहलपहल सुरु हुन्थ्यो। तीजको केही साताअघिदेखि नै होटलका सभा हल र खुला परिसरमा दर खाने कार्यक्रम आयोजना हुन्थे। महिलाहरू समूह–समूहमा भेला भएर दर खान्थे, नाचगान गर्थे र तीजको उत्सव मनाउँथे। तर यस वर्ष कुश्माको त्यो रौनक हराएको छ।
भोटेकोशीमा आएको बाढी, वर्षा तथा पहिरोका कारण सिर्जिएको विपद्को असर कुश्माको पर्यटन क्षेत्रमा मात्रै होइन, तीजको सामुदायिक उत्सवमा समेत देखिएको छ। विगतका वर्षमा तीज आउनुभन्दा तीन–चार साताअघिदेखि नै खचाखच हुने होटल तथा रिसोर्टहरू यस वर्ष भने अपेक्षाकृत सुनसान छन्।
कुश्मास्थित एड्भेन्चर रिसोर्ट, द क्लिफ, रोयल, बेन्जु लगायतका होटल तथा रिसोर्टमा विगतका वर्षमा दर्जनभन्दा बढी सामुदायिक दर खाने कार्यक्रम आयोजना हुने गरेका थिए। विभिन्न महिला समूह, सहकारी, संघसंस्था तथा सामाजिक समूहले होटल तथा रिसोर्टमा कार्यक्रम आयोजना गरेर सामूहिक रूपमा तीज मनाउने गरेका थिए। कतिपय ठाउँमा तीज विशेष मेला तथा सांस्कृतिक कार्यक्रमसमेत हुने गरेका थिए।
तर यसपटक त्यस्ता कार्यक्रमको संख्या निकै घटेको छ। बाढीपहिरो र सडक अवरोधका कारण बाहिरी पर्यटकको आगमन घटेसँगै होटल व्यवसाय प्रभावित भइरहेका बेला तीजको समयमा हुने आन्तरिक चहलपहलसमेत देखिएन।
गत वर्ष यही समयमा होटलका सभाहलहरू दर खाने कार्यक्रमका लागि अग्रिम बुकिङ हुने गरेका थिए। बिहानदेखि साँझसम्म महिलाका समूहहरू आउने, दर खाने, तीजका गीतमा नाच्ने र रमाइलो गर्ने दृश्य सामान्यजस्तै बनेका थिए। यस वर्ष भने कतिपय होटलमा सामान्य चहलपहलसमेत देखिन छाडेको व्यवसायीहरू बताउँछन्।
तीज नेपाली महिलाको महत्वपूर्ण सांस्कृतिक पर्व मात्रै होइन, पछिल्ला वर्षहरूमा यसले स्थानीय होटल तथा पर्यटन व्यवसायलाई समेत चलायमान बनाउँदै आएको थियो। सामूहिक दर खाने कार्यक्रम, तीज मेला र सांस्कृतिक कार्यक्रमले होटल व्यवसायमा प्रत्यक्ष आर्थिक गतिविधि बढाउने गरेको थियो।
तर विपद्को प्रभावले यस वर्ष तीजको उत्सवमा समेत निराशाको छाया परेको छ। एकातिर बाढीपहिरोका कारण जनजीवन प्रभावित छ भने अर्कोतर्फ त्यसको असर व्यवसाय, पर्यटन र सामाजिक गतिविधिसम्म पुगेको छ।
कुश्मामा तीजको समयमा देखिने राताम्मे सारीमा सजिएका महिलाका समूह, होटलका भरिभराउ परिसर, दरका परिकार र तीज गीतमा गुञ्जिने वातावरण यसपटक विगतजस्तो देखिएन।
तीज आयो, तर कुश्माका होटलमा विगतको जस्तो तीज आएन। विपद्ले सडक र पर्यटन मात्रै होइन, सामूहिक रूपमा खुसी साटासाट गर्ने पर्वको रौनकसमेत केही हदसम्म खोसेको छ।
