२५ भदाैं, पर्वत । कुश्मा नगरपालिकामा सञ्चालित मुख स्वास्थ्य परियोजनाअन्तर्गत आर्थिक वर्ष २०८२/८३ मा २ हजार ८ सयभन्दा बढी नागरिकले मुख तथा दाँतसम्बन्धी परीक्षण तथा उपचार सेवा लिएका छन्।
परियोजनाले सार्वजनिक गरेको सेवा प्रगति विवरणअनुसार आर्थिक वर्ष २०८१/८२ मा २ हजार ८ सय २९ जनाको मुख स्वास्थ्य परीक्षण गरिएकोमा गत आर्थिक वर्षमा यो संख्या बढेर २ हजार ८ सय ३४ पुगेको छ।
मुख तथा दाँतको स्वास्थ्य परीक्षणसँगै दाँतको क्षय रोकथाम तथा उपचारका विभिन्न सेवा पनि सञ्चालन गरिएको परियोजनाले जनाएको छ। अघिल्लो आर्थिक वर्षको तुलनामा केही सेवाको संख्या घटेको भए पनि दाँतमा सुरक्षात्मक औषधि लगाउने तथा क्षयबाट जोगाउने सेवामा भने वृद्धि भएको देखिएको छ।
दाँत निकाल्ने सेवा लिनेको संख्या अघिल्लो आर्थिक वर्षमा २ सय ७० रहेकोमा गत आर्थिक वर्षमा घटेर १ सय २७ पुगेको छ। त्यसैगरी क्षय भएको दाँतको प्रारम्भिक उपचार सेवा ७ सय ८८ बाट घटेर ५ सय ६४ मा पुगेको छ।
दाँतमा क्षय हुन नदिन गरिने सुरक्षात्मक उपचार सेवा भने ३ सय ४६ बाट घटेर २ सय ८२ मा पुगेको छ। दाँतको क्षय नियन्त्रणका लागि प्रयोग गरिने अर्को उपचार सेवा २ सय ९३ बाट घटेर २ सय १९ मा पुगेको विवरणमा उल्लेख छ।
यसैगरी, बालबालिका तथा अन्य लक्षित समूहमा दाँतको क्षय रोकथामका लागि गरिने विशेष उपचार सेवा भने उल्लेख्य रूपमा बढेको छ। अघिल्लो आर्थिक वर्षमा १ सय १० जनाले यस्तो सेवा लिएकोमा गत आर्थिक वर्षमा यो संख्या बढेर ३ सय ४२ पुगेको छ।
दाँतलाई क्षयबाट जोगाउन गरिने फ्लोराइडयुक्त औषधि लगाउने सेवा लिनेको संख्या पनि बढेको छ। अघिल्लो आर्थिक वर्षमा १ हजार ९ सय ६५ जना रहेकोमा गत आर्थिक वर्षमा बढेर २ हजार ९९ जना पुगेको छ।
जटिल प्रकृतिका समस्या भएका बिरामीलाई माथिल्लो स्वास्थ्य संस्थामा पठाउने क्रम पनि जारी रहेको परियोजनाले जनाएको छ। सामान्य तहको उपचारका लागि अन्यत्र पठाइएका बिरामीको संख्या १० बाट बढेर २९ पुगेको छ भने थप विशेषज्ञ उपचारका लागि पठाइएका बिरामीको संख्या ३ सय ६५ बाट घटेर ३ सय ५४ पुगेको छ।
समग्रमा कुश्मा नगरपालिकामा मुख स्वास्थ्य परीक्षणको पहुँच स्थिर रहनुका साथै दाँतको क्षय रोकथाम तथा सुरक्षात्मक उपचारतर्फ सेवाग्राहीको पहुँच बढेको परियोजनाको तथ्यांकले देखाएको छ।
